یوٹرن ، مذموم یا ممدوح

تحریر: ساجد مطہری

سیاست کی دنیا میں  کبھی تو  ''یوٹرن''  کو ایک مذموم لفظ سمجھا جاتا ہے اور کبھی اسے سیاسی دنیا کا جزوِ لا  ینفک خیال کیا جاتا ہے۔اگر مذہبی نقطہ نظر سے دیکھا جائے تو نظریات، افکار اور آئیڈیلوجی میں تبدیلی اور ارتقا انسانی فطرت کا تقاضا ہے کیونکہ انسان خطا کا پتلا اور کمال کا متلاشی ہے، لہذا وہ غیر ارادی طور پر اچھی فکر اور نئے نظریے و ائیڈیلوجی کے سامنے سرتسلیم خم کر لیتا ہے جبکہ صرف اللہ تعالی کی ذات اس قسم کے حالات سے مبراء و منزہ ہے، اس کا ارادہ پکا اور فیصلہ اٹل ہوتا ہے اس میں تبدیلی (بداء) کی کوئی گنجائش نہیں رہتی۔

یہ تمام باتیں اپنی جگہ تاہم سیاست کی دنیا ہی الگ ہے، وہاں سیاستدان مفاد پرست ہوتے ہیں، ذاتی انا اور کرسی کی خاطر حالات کے ساتھ کروٹیں اور  پارٹیاں  حتیٰ کہ نظریات بھی  تبدیل کر دیتے ہیں۔

عمران خان کا یوٹرن کے حوالے سے حالیہ بیان انتہائی افسوسناک ہے، جس میں انہوں نے یوٹرن لینے کو لیڈرشپ کے لیے لازمی حصہ قرار دیا اور کہا''یوٹرن نہ لینے والا کبھی اچھا لیڈر نہیں ہوتا'' یا ''اچھا لیڈر حالات کے مطابق یوٹرن لیتا ہے"

خان صاحب  کے رویے اور گفتگو سے لگتا ہے کہ وہ یوٹرن میں اصولوں سے دستبرداری کو بھی عیب و عار نہیں سمجھتے، یہی وجہ ہے کہ ان کے ہاں انتخاباتی شعار اور اسکی حالیہ داخلی اور خارجی پالیسیوں میں واضح تضاد دکھائی دیتا ہے۔

وہ انتخابات سے پہلے یہی نعرہ لگاتے تھے کہ "بھیک نہیں مانگوں گا" اور اب حکومت سنبھالے ہوئے اس قلیل سی مدت میں وہ کبھی سعودی عرب سے مدد مانگ رہے ہیں  تو کبھی چین کے در پر دستک دے رہے ہیں جبکہ وہ آئی ایم ایف  کو بھی قرضے کی درخواست دے چکے ہیں۔

حکومت کی غلط پالیسیوں کے باعث حکومت کے سو دن مکمل ہونے سے پہلے ہی ڈالر کے مقابلے میں روپے کی قدر میں 20 فیصد سے زائد کمی آئی ہے جس سے ملکی معیشت بری طرح متاثر ہوئی ہے اور اب کیونکہ پاکستان نے اپنا قرضہ ڈالرز میں ہی ادا کرنا ہے لہذا  پہلے ہی سے قرضوں کے ملبے تلے ڈوبے پاکستان کے مشکلات میں مزید اضافہ ہوگیا ہے۔

خان صاحب کہا کرتے تھے کہ "ملک کا قرضہ بڑے بڑے لٹیروں سے چکانا ہے، غریب عوام سے نہیں" جبکہ اب ہم مشاہدہ کر رہے ہیں کہ بڑے بڑے چور دندناتے پھیر رہے ہیں جبکہ غریب عوام کا استحصال کیا جا رہا ہے، عام استعمال کی چیزوں پر دگنا ٹیکس لگا کر عوام کا جینا دو بھر کر دیا گیا ہے، پیٹرول اور سی این جی کی قیمتیں آسمان سے باتیں کر رہی ہیں۔

اسی طرح خان صاحب کا کہنا تھا کہ "ہم دہشت گردی کا خاتمہ کریں گے" حالانکہ جو چیز انکی دو تین مہینوں کی حکومت میں واضح اور آشکار دکھائی دے رہی ہے، یہ ہے کہ موجودہ حکومت نے دہشت گردوں کے آقا سعودی عرب سے اپنا ناطہ جوڑا لیا ہے اور صرف یہی نہیں بلکہ بات یہاں تک آ پہنچی ہے کہ ملک کی ستر سالہ تاریخ میں پہلی دفعہ قومی اسمبلی میں غاصب اور خونخوار اسرائیل کو تسلیم کرنے کی بحثیں شروع ہو گئی ہیں۔

اگرچہ اس میں عمران حکومت پوری طرح قصور وار ہے البتہ دوسری طرف عوام کیزہنی عقب ماندگی، میڈیا اور دانشمند حضرات کی سستی اور کاہلی کا بھی اچھا خاصہ عمل دخل ہے۔ ہمارے چونکہ عوام کو تعلیمی و تحلیلی تجزیہ و تحلیل کے بجائے خبری چٹکلوں اور گرما گرم  ایشوز  کے پیچھے لگایا جاتا ہے اور عوام حالات کے پسِ منظر  سے آگاہ نہیں ہوتے اور نہ ہی ان میں سیاسی بصیرت پیدا ہوتی ہے، جسکی وجہ سے آئے روز  غیر متوقع حالات پیش آتے ہیں۔

یہ ہم سب کی ملی زمہ داری بنتی ہے کہ ہم عوام میں سیاسی بصیرت پیدا کرنے کے حوالے سے انفرادی اور اجتماعی سطح پر  بصیرت افروز گفتگو کریں اور علمی و تحلیلی مواد تولید کریں۔


افکار و نظریات: یوٹرن, مذموم یا ممدوح