ایران میں لاپتہ پاکستانی

نذر حافی

گمشدگی اور لاپتہ ہو جانا، بہت بڑا المیہ ہے، خصوصاً جب کسی المیے کے پیچھے سرکاری اداروں کا ہاتھ ہو، یہ گمشدگیاں انواع و اقسام کی ہوتی ہیں،  اور ان کے مقاصد بھی مختلف ہوتے ہیں، اگرچہ انسانی حقوق کی تنطیمیں اور آئین پاکستان ایسی گمشدگیوں اور ماورای عدالت عوام کے لاپتہ ہونے کی اجازت نہیں دیتا تاہم ایسا ہونا ایک زمینی حقیقت ہے اور سانحہ ساہیوال کے بعد ماورای عدالت قتل کرنے پر بھی مہر تصدیق ثبت ہوچکی ہے۔اس میں کوئی دو رائے نہیں ہیں کہ ہمارے ہاں اپنے حقوق کے لئے بات کرنے والوں کو غدار اور ملک و ملت کا دشمن قرار دے دیا جاتا ہے ۔یہی وجہ ہے کہ اکثر مناطق میں بات حقوق  کے مطالبے سے شروع ہوتی ہے اور افراد کے لاپتہ ہونے اور ماورائے قتل پر جا کر ختم ہوتی ہے۔

اکثر افراد ریاست کو ماں سمجھ کر اپنی فریاد بلند کرتے ہیں جبکہ ریاستی ادارے ان سے سوتیلے بچوں جیسا سلوک کرتے ہیں، افراد اور ریاستی اداروں کے درمیان، اعتماد، محبت، باہمی تعاون اور حقوق و فرائض کا رشتہ ہونا چاہیے۔ جب کسی بھی وجہ سے یہ رشتہ ٹوٹ جاتا ہے یا کمزور ہو جاتا ہے تو  پھر اس رشتے کو بحال ہونے میں کئی پیچیدگیوں کا سامنا کرنا پڑتا ہے اور اکثر عوام اور ریاستی اداروں کے درمیان فاصلہ بڑھتاہی چلا جاتا ہے۔اگرچہ یہ بڑھتا ہوا فاصلہ عوام اور ریاستی اداروں دونوں کے نقصان میں ہوتا ہے تاہم  بعض اوقات اس کو ختم کرنا دونوں کے ہی بس میں نہیں رہتا۔     جب سرکاری ادارے اس فاصلے کو اہمیت نہیں دیتے اور عوامی ناراضگی و بے چینی کی پرواہ نہیں کرتے تو یہ فاصلے عوام میں اضطراب اور بے چینی کو جنم دیتے ہیں۔ اس عوامی اضطراب اور بے چینی سے ایسی تحریکیں، تنظیمیں اور گروہ وجود میں آتے ہیں جو قوم کو تقسیم در تقسیم کرتے چلے جاتے ہیں۔

اس تقسیم در تقسیم کے بعد سرکار ی ادارے اور عوام ایک ملت ہونے کے بجائے دو  سخت دشمنوں کی صورت اختیار کر لیتے ہیں، زندہ باد اور مردہ باد کا سلسلہ شروع ہو جاتا ہے اور صورتحال ہائے ہائے اور پتلے جلانے سے لے کر جلسے جلوسوں اور ٹائر جلانے کی طرف چلی جاتی ہے۔

سرکاری دارے، عوام کی خدمت کے لئے بنائے جاتے ہیں اور سرکاری اہلکاروں کا فریضہ فقط عوام کی خدمت ہے، لیکن ہمارے ہاں عوام کے ساتھ سرکاری داروں اور اہلکاروں کرویہ ایسا ہوتا ہے کہ مکتی باہنی جیسی تحریکیں اور منظور پشتین جیسے لیڈر منظر عام پر آنے لگتے ہیں۔ایسی تحریکیں اور ایسے لیڈر سرکاری اداروں کے پیداکردہ حالات کی پیداوار ہوتے ہیں۔

سرکاری اداروں پر چیک ایند بیلنس نہ ہونے کی وجہ سے محبتوں کے بجائے نفرتیں ہی پھیلتی رہتی ہیں اور ان نفرتوں سے دشمن ممالک اور ان کی ایجنسیاں بھی بھرپور فائدہ اٹھاتی ہیں۔

لاپتہ افراد، گمشدہ لوگوں اور ماورائے عدالت قتل ہونے والے واقعات کے تناظر میں پاکستان کے اعلیٰ حکام سے درمندانہ اپیل ہے کہ خدارا عوام اور سرکاری اداروں کے درمیان  فاصلوں کو کم کیجئے، محبتوں کو عام کیجئے، سرکاری ملازمین پر چیک اینڈ بیلنس رکھئے اور عوامی مسائل اور شکایات کا فوری اور از خود نوٹس لیجئے۔

ہم اس ساری تمہید کے بعد ایران میں لاپتہ ہونے اور گمشدہ ہونے والے پاکستانیوں کے بارے میں کچھ کہنا چاہتے ہیں، جیساکہ  پہلی سطر میں ہم عرض کر چکے ہیں کہ سرکاری اداروں کے ہاتھوں لاپتہ ہونے والے افراد کی گمشدگیوں کی انواع و اقسام ہوتی ہیں۔ایران میں جو پاکستانی لاپتہ اور گمشدہ ہیں یہ اس طرح کے لاپتہ افراد نہیں ہیں  کہ جس طرح کے پاکستان میں پائے جاتے ہیں بلکہ  ان کی ایک الگ قسم ہے۔ یہ اس طرح کے لوگ ہیں جنہیں گزشتہ چھ ماہ سے تہران میں قائم پاکستان ایمبیسی پاسپورٹ بنا کر نہیں دے رہی۔یہ لوگ ایک دوسرے ملک میں  رہتے ہوئےاپنی اور اپنے بیوی بچوں کی شناخت کھو چکے ہیں۔

جیساکہ ہم سب جانتے ہیں کہ پاسپورٹ ،قومی حکومت کی جانب سے جاری کی گئی ایک دستاویز ہےجو بین الاقوامی سفر کے لیے اپنے حامل کی شناخت اور قومیت کی تصدیق کرتی ہے۔ اور اس دستاویز پر اس شخص کے سفر کے دوران میں ہر بین الاقوامی سرحد کو عبور کرنے کی تاریخ درج کی جاتی ہے۔

پاسپورٹ کے بغیر کوئی بھی شخص کسی دوسرے ملک میں کیسے زندگی گزار تاہے اس کا اندازہ صرف اورصرف انہی لوگوں کو ہے جو  دوسرے ممالک میں زندگی گزارتے ہیں۔

اس وقت ایران میں مقیم پاکستانی اپنے قومی شناخت کے لئے جگہ جگہ ذلیل و خوار ہو رہے ہیں ، انہیں قدم قدم پر پاسپورٹ کی ضرورت پڑتی ہے لیکن ایمبیسی کی طرف سے چھ ماہ سے مسلسل یہی جواب دیا جاتا ہے کہ فکر نہ کریں یہ ایک ٹیکنیکل مسئلہ ہے جو بس بہت جلد حل ہو جائے گا۔

اس وقت ایران میں مقیم پاکستانی کس اضطراب اور پریشانی سے گزر رہے ہیں، اس کو درک کرنے اور اس مسئلے کو ترجیح  بنیادوں پر حل کرنے کی ضرورت ہے۔یاد رہے کہ ایران میں مقیم پاکستانی کمیونٹی کو تہران میں قائم پاکستان ایمبیسی کے اہلکاروں سے کوئی گلہ نہیں بلکہ اعلیٰ حکام سے شکایت ہے کہ جو چھ ماہ سے اس مسئلے کاکوئی حل نہیں نکال رہے۔

چھ ماہ سے یہ لوگ لاپتہ ہوچکے ہیں، اپنی قومی شناخت کھو چکے ہیں، انہیں اپنی قومی شناخت کے لئے مشہد تک کا طولانی سفر کرنا پڑتا ہے! کیا پاکستان میں کوئی ایسا ادارہ، کوئی ایسا ٹی وی چینل،کوئی ایسی وزارت، یا ایسی عدالت ہے جو اس قسم کی گمشدگیوں کا بھی نوٹس لے اور ایران میں مقیم پاکستانیوں کو ان کی کھوئی ہوئی شناخت واپس دلائے۔

 


افکار و نظریات: ایران میں لاپتہ پاکستانی