فوج اور فصلی بٹیرے
محمد بشیر دولتی

وفاداری دکھانا بھی ایک ہنر ہے۔ بالکل ایسے ہی جیسے وفاداری بدلنا ہنر ہے۔ سیانے لوگ موسم کے مطابق وفاداریاں دکھاتے اور بدلتے رہتے ہیں۔ ہمارے ہاں سیاسی رہنما ہوں یا بعض بزرگ علمائے کرام وہ بھی کافی موسم شناس واقع ہوئے ہیں۔ آج کل پاکستان میں فوج کے گُن گانے کا موسم ہے۔
بات فوج کی چل پڑی ہے تو یاد رکھئے کہ پاکستان کی بقا کی ضامن اس کی مضبوط فوج ہی ہے۔ ہمارے ملک میں وحدت کی کوئی علامت اگر ہے تو وہ یا تو قائد اعظم کی ذات ہے اور یا پھر پاک فوج ہے۔ عالمی ادارہ گلوبل دانش پاور کے مطابق پاکستانی فوج دنیا کی ساتویں سب سے بڑی طاقتور فوج ہے۔ اب اتنی بڑی طاقتور فوج کو بھی بعض لوگ آج کل بیوقوف بنانے کی کوشش میں مصروف ہیں۔
سوال یہ پیدا ہوتا ہے کہ کیا یہ موسمی سیاست دان اور علماء واقعتاً فوج سے مخلص اور وفادار ہیں؟ اگر آپ ان موسمی حضرات کی ماضی کی تقاریر و تحاریر اٹھا کر دیکھیں تو آپ کو پتہ چل جائے گا کہ یہ تو پاک فوج کے بدترین مخالف ہیں۔ان افراد میں فوج سے وفاداری کی موج اچانک ایسے موجزن ہوئی ہے کہ کہیں رکنے کا نام ہی نہیں لیتی۔ یہاں ہم یہ بھی عرض کرتے چلیں کہ وفاداری وہ ہے جو ذاتی فوائد،شخصی مقاصد، بدلتےحالات اور کسی ڈکٹیشن کے سبب نہ ہو۔
وفاداری وہ ہے جو اصولوں کی پاسداری کے لئے ہو جس میں دھوکہ اور فریب نہ ہو۔ مجھے یاد ہے کہ یہ آج کل مسلسل میڈیا اور منبرو محراب سے فوج کے گُن گانے والے ہی وہ لوگ ہیں جنہوں نے ماضی میں عوام کے اندر فوج مخالف جذبات بھرے ہیں ۔ انہیں کسی ایک فوجی جنرل کی بجائے پوری پاک فوج سے الرجی اور دشمنی تھی ۔آپ کو پی پی کے آخری دور میں میمو کیس یاد ہوگا ۔ یہ کیس کسی ایک جنرل کے خلاف نہیں تھا۔ دوہزار آٹھ سے دوہزار گیارہ تک امریکہ میں سفیر رہنے والے ،جنگ اخبار کا معروف کالم نگار حسین حقانی اس کیس کا مرکزی کردار تھا۔ حسین حقانی پر صدر آصف علی زرداری کا پیغام خفیہ طریقے سے امریکہ پہنچانے کا الزام تھا۔ پیغام میں امریکی ایڈمرل ملن سے پاک آرمی اور قومی سکیورٹی اداروں کو نکیل ڈالنے اور ان کے خلاف نئی اصلاحات کی خواہش اور ضرورت کی درخواست کی گئی تھی۔اس عمل کو نوازشریف نے ملک سے غداری قرار دے کر کیس دائر کیا تھا۔ اس الزام کے بعد حسین حقانی کو نہ فقط امریکہ میں سفیر کے عہدے سے ہٹا یا گیا بلکہ پھر وہ امریکہ کا ہی ہوکر رہ گیا۔
محترم نوازشریف پر تو حاضر سروس آرمی چیف اور اس کے جہاز کو تباہ کرنے کی سازش کا الزام تھا۔ صرف یہی نہیں بلکہ جنرل مشرف اور پاک فوج کی انڈیا کے خلاف کامیاب کارگل جنگ کو امریکی یاترا کے بعد پسپائی میں بدلنے کا الزام بھی ہے۔ کارگل جنگ میں ہمارے اتنے فوجی شہید نہیں ہوئے جتنے نوازشریف کے امریکی یاترا کے سبب واپسی پر ہوئے۔
چھبیس نومبر دوہزار آٹھ میں ممبئی حملہ کیس کی تحقیقات بھی پاکستانی عدالت سے کروائی گئی۔ عدالت نے اس حملے میں مبینہ طور پر ملوث ساجد میر کو مالی تعاون کے الزام میں پندرہ سال قید کی سزا سنائی۔
جب تیرہ جنوری دوہزار سولہ کو بھارتی پنجاب میں پٹھان کوٹ کا واقعہ پیش آیا تو نوازشریف نے تحقیقات کے لئے پاکستان میں پولیس اور قومی اداروں کے سینئر افسران پر مشتمل تحقیقاتی کمیٹی بنائی ۔بعد میں نوازشریف نے پاکستان کے ملوث ہونے کا بیان دیا تھا۔
ڈان لیکس کیس بھی ہم سے مخفی نہیں، جس میں عسکری اور سیاسی اداروں کے راز لیک کرنے پر وفاقی وزیر اطلاعات پرویز رشید صاحب اور وزیر اعظم نوازشریف کے معاون خصوصی طارق فاطمی کو برطرف ہونا پڑا۔
آج کل میں لوگوں کی فوج سے وفاداری چیک کرنے کے لئے سوشل میڈیا پر محفوظ مختلف کلپس دیکھ رہا ہوں۔
ایک وڈیو میں محترم آصف علی زرداری صاحب فوج کی اینٹ سے اینٹ بجانے کی بات کررہے تھے۔فوجی جنرلوں کو وقتی اور خود و دیگر سیاست دانوں کو سدا بہار قرار دے رہے تھے۔جناب مولانا فضل الرحمن صاحب فوجی جنرلوں کو اسرائیل کے ایجنٹ قرار دیتے ہوئے دھمکیاں دے رہے تھے۔
سب سے زیادہ فوج کے خلاف نون لیگی رہنما بول رہے تھے۔نون لیگی رہنما حاضر سروس جنرلوں کے علاؤہ پوری فوج اور فوجی بجٹ کے خلاف زبان درازی کررہے تھے۔محترم نواز شریف صاحب واجپائی کی حمایت اور پاک فوج کے خلاف بول رہے تھے۔
ایک وڈیو میں نوازشریف صاحب جنرل قمرجاوید باجوہ،جنرل فیض حمید،اور جنرل عرفان ملک کو سنگین نتائج کی دھمکیاں دے رہے تھے۔مریم نواز اپنے مقدمات اور سزاؤں کو چند جنرلوں کی سازش اور عدلیہ سمیت پانچ کے ٹولے کے خلاف تقریر کررہی تھی۔ یہ جو دھشت گردی ہے اس کے پیچھے وردی ہے اور وردی والے بےغیرت کے نعرے لگوا کر مسکراتی جارہی تھی۔
پرویز رشید تو کہہ رہے تھے کہ اس پاکستان کو فوج نے تباہ کردیا،پاکستان کو لہو لہان کردیا پاکستان کو تباہ اور خراب کریں فوج کے جنرل اور ٹھیک کریں نوازشریف۔خواجہ سعد رفیق صاحب ڈیفنس بجٹ پر نقد کرتے ہوئے فوج کو پراپرٹی ڈیلر بننے سے منع کر رہے تھے۔
خواجہ آصف صاحب تو اڑتالیس سے لے کر کارگل تک تمام جنگوں میں پاک فوج کو شکست خوردہ ثابت کرنے کے ساتھ اربوں ڈالر دفاع کے نام پر پیٹ کاٹ کر دینے کا ذکر کررہے تھے۔
سردار ایاز صادق تو حاضر سروس جنرل کو بھارت کے خوف سے پسینے سے شرابور ہونے اور پیر کانپنے کا دعوای کر رہے تھے۔میں نے کئی وڈیوز عمران خان کی بھی دیکھیں ۔ عمران خان حمایت یا مخالفت سے ہٹ کر میں نے خان کو کئی کلپس میں یہ کہتے پایا ہے کہ جس میں وہ مختلف مراحل میں یہی کہہ رہے تھے کہ ملک بھی میرا ہے فوج بھی میری ہے۔
اگر پاک فوج مضبوط نہ ہوتی تو دشمن پاکستان کے تین ٹکڑے کرتے وغیرہ مگر۔۔۔ مگر نو مئی ۲۰۲۳ کے احتجاجات کو اس طرح پیش کیا گیا او ربعض نادان لوگوں کو سازشی عناصر نے ایسے استعمال کیا کہ جس سے یہ تاثر دیا جا سکے کہ عمران خان تو فوج کا دشمن ہے۔خیر یہ تو تاریخ بتائے گی کہ نو مئی کے دلخراش سانحے کے پیچھے کون تھا!۔
جب میں گرگٹ کی طرح رنگ بدلنے والے سیاستدانوں اور مذہبی رہنماؤں کی فوج دشمن وڈیوز دیکھتا ہوں اور پھر ان کے موجودہ وفاداری کے بیانات اور ان کے کارکنوں اور شاگردوں کو فوج کا ٹھیکیدار بنے ہوئے دیکھتا ہوں تو بے ساختہ عمران خان کو سلام کرتا ہوں ۔
عمران خان آج بھی اِن بدنامِ زمانہ اور موسمی لوگوں سے زیادہ فوج کا وفادار اور حامی ہے۔مرحوم جنرل مشرف ،جنرل راحیل شریف اور جنرل فیض کے خلاف محترم نواز شریف کے مختلف کلپس اب بھی سوشل میڈیا پر موجود ہیں۔میں نے دیکھا کہ جس وقت پاکستانی افواج کو کنٹرول کرنے کی درخواست امریکہ سے کی جارہی تھی ،نوازشریف کھل کر پاک فوج اور حاضر سروس جنرل کے خلاف اوقات دکھانے، اورگریباں پکڑنے کی باتیں کی کررہےتھے، ہماری فوج کو شکست خوردہ اور اس کی اینٹ سے اینٹ بجانے کی باتیں ہورہی تھیں ۔
یہ فصلی بٹیرے اب فوج کی آنکھوں میں دھول جھونکنے کے درپے ہیں۔ پاک فوج سے اگر کوئی مخلص ہے تو وہ اس ملک کے عوام ہیں ۔ ملک کی حفاظت فقط مضبوط فوج سے نہیں ہوتی اگر ایسا ہوتا تو عراق و لیبیا بھی محفوظ ہوتے۔ ملک کی حفاظت ایٹم بم سے بھی نہیں ہوتی اگر ایسا ہوتا تو روس کے کئی ٹکڑے نہ ہوتے۔ ملک کی حفاظت کے لئے ضروری ہے کہ فوج بھی مضبوط ہو اور اسے عوامی حمایت بھی حاصل ہو۔
ہم سب نے دیکھا کہ شام میں مضبوط فوج اور عوامی حمایت کے سبب استعمار👈کی لاکھ کوشش کے باوجود شام کے ٹکڑے نہ کئے جاسکے۔ خدا ہماری فوج اور عوام کے درمیان اعتماد کو باقی رکھے۔ جو طاقتیں ہماری فوج اور عوام میں جدائی ڈالنا چاہتی ہیں انہیں ناکام و نامراد کرے۔خدا وند عالم پاک فوج کو اندرونی و بیرونی دشمنوں اور فصلی بٹیروں سے محفوظ رکھے اور ملک خدا داد پاکستان ہمیشہ سلامت رہے۔آمین۔