میں اور جماعتِ اسلامی
تحریر:محمد بشیر دولتی

میرا جماعت اسلامی سے نہ مسلکی تعلق ہے اور نہ تنظیمی تعلق ۔مجھے پھر بھی جماعت اسلامی سے محبت ہے۔ یہ تنظیم قرآن مجید کو ایک مکمل ضابطہ حیات سمجھتی ہے۔ اسلام کی حاکمیت پر یقین اور اس یقین کو عملی کرنے کے لئے مسلسل جدو جہد کررہی ہے۔ جماعت اسلامی ایک مضبوط سسٹیمک مذہبی سیاسی تنظیم کا نام ہے۔ تربیت یافتہ ،شائستہ اور تعلیم یافتہ لوگوں کی کثیر تعداد ان کے پاس موجود ہے۔ اسلامی جمعیت جیسی مذہبی طلبہ تنظیم کے علاؤہ پاسبان اور شباب ملی جیسی کم تربیت یافتہ مگر جوانوں پر مشتمل قوت بھی موجود ہے۔ ملک پاکستان میں بظاہر استعمار مخالف ایک مضبوط قوت ہے۔ جوانوں کو اقبال کا فکری شاہین بنانے کے لئے سوشل میڈیا سمیت حضوری دروس کا ایک تربیتی سلسلہ جاری ہے۔ فلاحی اداروں سے لے کر تعلیمی مراکز تک، پبلشر سے لے کر نصاب سازی تک، ڈاکٹرز سے لے کر وکلا ء تک، دینی طلبا سے لے کر جوانوں تک ان کے پاس ادارے ہیں، افراد ہیں، فکر و شعور کے ساتھ ایک بڑی افرادی قوت ان کے پاس موجود ہے۔
اس جماعت سے میری قربت بیس سال پرانی ہے۔ کراچی میں جماعت اسلامی کے جلسوں، درسوں اور لانگ مارچ کے احتجاجات میں شامل ہوتا رہا ہوں۔ محترم قاضی حسین احمد اور سابق میئر کراچی نعمت اللہ خان ، پروفیسر غفور احمد مرحوم وغیرہ کو قریب سے سنتا رہا ہوں۔آج بھی جماعت اسلامی کو پاکستان میں مذہبی سیاست کا علمبردار سمجھتا ہوں۔
یہ بات پاکستان بننے سے پہلے کی ہے جب برصغیر کے عظیم مفکر حضرت سید ابوالاعلیٰ مودودی اور ان کے 74 ساتھیوں نے چھبیس اگست انیس سو اکتالیس(26 اگست 1941) کو لاہور میں ایک سیاسی مذہبی تنظیم کی بنیاد رکھی، جسے دنیا جماعت اسلامی کے نام سے جانتی ہے۔میرے خیال میں "حسن بنا" کی تنظیم مصر کے اخوان المسلمین کے بعد یہ عالم اسلام کی دوسری بڑی اور قدیمی جماعت ہے۔اس وقت پاکستان میں کوئی جمہوری تنظیم اگر ہے تو وہ جماعت اسلامی ہے۔ پی پی ، نون لیگ،جمعیت علمائے اسلام تو موروثی جماعتیں ہیں۔ پی ٹی آئی کے بارے میں ابھی کچھ نہیں کہا جا سکتا۔ جمعیت علمائے اسلام میں دینی مدارس کے طلبا تو نظر آتے ہیں مگر اس تنظیم اور اس کے آئین میں اسلامی سیاست نظر نہیں آتی۔طاہر القادری کی عوامی تحریک اگرچہ عوامی تھی مگر ان کے پاس ملک سنبھالنے ،نظام چلانے کے لئے تربیت یافتہ افراد کی بھی کوئی کمی نہیں ۔ مگر افسوس کہ وہ اب اس موجودہ نظام سے دل برداشتہ ہوکر صوفی ازم کےشکار ہوگئے ہیں۔ نظام سے مایوس اس عظیم دانشور نے اپنے شہیدوں کو بھی اب تقریبا بھلادیا ہے، ایسے میں اب پورے پاکستان میں جماعت اسلامی ہی اسلامی سیاست کے عاشقوں کے لئے امید کی آخری کرن ہے۔
اب خربوزے کو دیکھ کر خربوزہ رنگ پکڑ چکا ہے۔ جماعت پر بھی دوسری تنظیموں کا رنگ چڑھتا دھائی دے رہا ہے۔ اس میں اب قرآن مجید کے آفاقی پیام، مولانا مودودی کی عالمی سیاسی افکار اور قاضی حسین احمد مرحوم کی سنجیدگی و وقار نظر نہیں آتا۔ اس تنظیم میں شدت پسندی نمایاں ہوتی جا رہی ہے۔ اس تنظیم میں اب مولانا مودودی کی قرآنی و فکری افکار کی بجائے کالعدم شدت پسند تنظیموں کی سوچ اور فرقہ پرستی نظر آرہی ہے۔ ان کے نمائندے اب اسلامی انقلاب کی بجائے قومی اسمبلی میں شدت پسندی کا بل لےکے آتے ہیں، اپنا نظام تعلیم و نصاب رکھنے کے باوجود متنازعہ نصاب تعلیم پر خوش نظر آتے ہیں ۔ یہ جماعت بھی اب استعمار مخالف کردار کے نبھانے کے بجائے فرقہ واریت اور نفرتوں کی آگ کو بھڑکانے میں مصروف ہے۔ اسلامی سیاست کا نعرہ اب فقط نعروں اور جلسوں میں ہی بلند ہوتا ہے۔
عملا اب یہ مذہبی انقلابی تنظیم بھی دنیاوی سیاست میں ہی مگن لگتی ہے۔ مصر میں اخوان المسلمین کے خلاف امریکہ و سعودیہ کی ظالمانہ و بےدردانہ عمل پر اس تنظیم نے کوئی خاص رد عمل نہیں دکھایا۔جنرل سیسی کی فوجی جمہوریت اور اخوان مصر پر ہونے والی بربریت پر واجبی سے رد عمل پر اکتفا کیا گیا۔ جنرل سیسی کی فوجی جمہوریت کی طرف سے مظلومین فلسطین پر باڈر پر ہونے والی سختیوں پر گہری خاموشیوں کا پہرہ ہے۔ ترکی کے اسرائیل کے ساتھ بڑھتے ہوئے سفارتی و تجارتی تعلقات پر حالت سکوت میں ہے۔اب تو جماعت اسلامی شیخ نواف تکروری جیسوں کو فلسطین کی آواز بناکر پاکستان میں متعارف کروا رہی ہے۔
ان کے علاؤہ رجیم چینج آپریشن کے وقت استعمار کے ہتھکنڈوں کو روکنے کی اس تنظیم نے کوئی کوشش نہیں کی بلکہ ضمنی الیکشن میں پی ڈی ایم کی اتحادی بن گئی ۔ جماعت نے ملک میں بےتحاشا بڑھتی ہوئی مہنگائی اور کرپشن پر خاطر خواہ کردار ادا نہیں کیا۔ پاکستان میں کھلم کھلا سیاسی ورکروں اور خواتین پر ہونے والے مظالم پر آنکھیں بند کرلیں۔ اپنے سابق ممبر اور رکن اعظم سواتی کے خلاف ہونے والے ظلم و ذیادتی پر بھی مکمل خاموش رہی۔پاکستان میں استعمار مخالف ابھرتی آواز کو بری طرح دبانے پر کوئی ٹھوس رد عمل کا مظاہرہ نہیں کیا۔فرقہ واریت سے بھر پور بل ، تحریک انصاف کے ووٹرز توڑنے کے لئے استعمال ہوا، اس کے باوجود کراچی کے بلدیاتی الیکشن میں تحریک انصاف نے جماعت اسلامی کو سپورٹ کیا لیکن اکثریت میں ہونے کے باوجود ظلم و دھاندلی پر مشتمل نظام نے جماعت اسلامی کو میئرشپ سے بھی محروم کردیا۔ چاہیےتو یہ تھا کہ جماعت اسلامی کی آنکھیں کھل جاتیں لیکن ایسا نہ ہوا۔ غزہ میں جنگ بندی کے لئے لائئ گئی قرار داد پر موجودہ حکومت اقوام متحدہ میں نیوٹرل رہی،رجیم چینج آپریشن کے بعد اسرائیل کو تسلیم کرنے کے لئے درپردہ کوششیں کیں، اس کے علاؤہ لاہور میں حمایت حماس ریلی سے پہلے اس حکومت نے اسے روکنے کی بھر پور کوشش کی، اسلام آباد میں جماعت اسلامی کے امیر اور تاجر رہنما سمیت کئی کارکنوں کو بھی گرفتار کیا گیا۔اس کے رد عمل میں کوئی خاص قدم جماعت نہیں اٹھایا اور امیر جماعت اسلامی جناب سراج الحق صاحب نے یہ بیان دے کر اپنی جان چھڑا لی کہ "ملک میں اب بھی بیرونی کال پر فیصلے ہورہے ہیں"۔
اس پر میں عرض کروں کہ حضور! افسوس اس سنہری دور کی ہم نے قدر ہی نہیں کی کہ جب مغربی میڈیا پر کوئی پاکستانی حکمران سینہ تان کر "ایبسلیوٹلی ناٹ" کہہ رہا تھا، اسرائیل کو تسلیم نہ کرنے کی باتیں کی جاتی تھیں،امریکن سی آئی اے سربراہ کو ملاقات کا وقت نہیں دیا جاتا تھا،امریکن سفیر اور سفارتی اہلکاروں کو محدود کر دیا گیا تھا۔اب تو امریکن سفیر گوادر اور بلوچستان میں عوامی اجتماعات میں لوگوں سے ملاقاتیں کرتے ہیں ،ان ملاقاتوں کے بعد ملک میں نہ فقط فرقہ واریت شروع ہوتی ہے بلکہ پاک فوج پر حملوں کا سلسہ بھی تیز ہوجاتا ہے۔
محترم سراج الحق صاحب ہم نے نہ اس دور کی قدر دانی کی اور نہ ہی اس بولنے والے کی قدر کی ۔ سی آئی اے کے سربراہ کو ملاقات کا وقت نہ دینے والے خود دار وزیر اعظم کو تخت سے گرا کر زنداں میں ڈالا گیا، ان کے رہنماؤں اور ورکروں پر بدترین تشدد کا سلسلہ آج بھی جاری ہے لیکن ان مظالم پر جماعت باجماعت خاموش ہے۔

اسلامی سیاست کا محور مظلوم کو تلاش کرکے اس کی حمایت کرنا ہے جبکہ دنیاوی سیاست کا محور طاقتور کو تلاش کر کے اس کی مدح سرائی کرنا ہے۔ کسی تعصب کے بغیر اگر دیکھا جائے تو پاکستان میں فقط مجلس وحدت المسلمین والے اس دینی و اصولی سیاست پر کاربند نظر آتے ہیں ۔ عوامی تحریک کے شہدا ء ہوں یا پاکستان میں استعمار کی کھلی مداخلت فقط راجہ ناصر عباس جعفری صاحب ہی اصولی موقف کو زندہ رکھے ہوئے اور مظلوموں کے ساتھ وفاداری کرتے نظر آتے ہیں۔

بات نعروں کی نہیں، ہم نعرہ کچھ بھی لگائیں،اسٹیج پر کچھ بھی کہیں،ریلیوں میں ،تقریروں میں،درسوں میں ،خطبوں میں کچھ بھی کہیں مگر عملا ہم مظلوم سے چشم پوشی اور ظالم کی مدح سرائی میں لگے ہوں تو یہ نہ قرآنی سیاست ہے اور نہ مودودی کی سیاست ۔
میری جماعت اسلامی کے سربراہوں سے گزارش ہے کہ غزہ کے مظلومین کی حمایت بھی ضروری ہے لیکن اپنے ملک میں استعماری غلبے، عزت نفس سے ہاتھ دھوئے اعظم سواتیوں، غزہ کی طرح محاصرے میں گرفتار پاراچناریوں، بےسبب جیلوں میں سسکتے انصافیوں، خواتین ورکروں،حق گوئی پر دم گٹھتے صحافیوں،کرپشن اور چوروں میں پھنسے پاکستانیوں کے لئے اصولی و منطقی آواز اٹھا لیجئے تاکہ دینی سیاست کے نعرے کا کچھ تو بھرم رہ جائے۔
خدارا اپنی ساکھ اور بساط کے مطابق بصیرت سے کام لیجئے۔استعمار کے آلہ کاروں سے دوری اختیار کیجئے ۔آپ کے پاس افرادی قوت کی کمی نہیں خدارا ہر ظالم سے نفرت ہر مظلوم کی حمایت کا اصولی موقف اختیار کیجئے۔
آخر میں جماعت اسلامی سے تعلق رکھنے والے میرے دوستوں سے معذرت کے ساتھ کہنا چاہتا ہوں کہ

خفا نہ ہونا مری جرأت تخاطب پر
تمہیں خبر ہے مری زندگی کی آس ہو تم

وائس آف نیشن کی ریسرچ کمیونٹی کو جوائن کیجئے

پسندیدہ ترین

جہاں امریکہ کا اشارہ

استشراق

ابلاغِ عامہ


افکار و نظریات: میں اور جماعتِ اسلامی