رمضان المبارک سے کیا سیکھا؟
✍ سید احتشام علی کاظمی


زندگی بہت تیز رفتاری کے ساتھ گزر رہی ہے۔ لمحہ بہ لمحہ موت کے قریب ہو رہے ہیں۔ کتنے لوگ جا رہے ہیں ۔کتنے چلے گئے ہیں۔ رمضان المبارک بھی آخر کار اختتام کو پہنچ گیا ہے۔ایک لحظے کے لیے اگر سوچیں کہ جس طرح رمضان المبارک گزر گیا اسی طرح انسان کی زندگی بھی گزر رہی ہے تو پہلے بچپن پھر جوانی پھر بڑھاپا اس طرح زندگی کا اختتام ہوتا ہے
۔ خداوند متعال نے انسان کو زندگی اس لیے دی کہ وہ اپنی آخرت سنوارے۔ زندگی ایک نعمت ہے اس طرح رمضان المبارک بھی ایک نعمت ہے۔ جو انسان کی زندگی کو سنوارنے کے لیے ہر سال آتا ہے۔ زندگی ایک آزمائش گاہ ہے کہ جس سے انسان سیکھتا ہے اور بالکل اسی طرح رمضان المبارک بھی ایک انسان کے لیے آزمائش گاہ ہے ۔
اب سوال یہ ہے کہ رمضان المبارک سے ہم نے کیا سیکھا ؟ رمضان المبارک کو قرآن یا حدیث و روایات میں بھی دیکھا جائے تو یہی ملتا ہے کہ رمضان المبارک انسان کی روح کو زندہ کرتا ہے اور انسان میں انسانیت کا احساس پیدا کرتا ہے۔
رمضان المبارک میں عبادات و اطاعت باقی ماہ کے مقابل زیادہ ہوتی ہیں ۔ رمضان المبارک میں لوگ جگہ جگہ افطاری کا بندوبست کرتے ہیں۔ فقیروں کو کھانا کھلاتے ہیں۔ غریبوں کو لباس دیتے ہیں۔ تنگدستوں کی مدد کی جاتی ہے۔ اس کے علاوہ بھی ہر لحاظ سے انسانیت کی خدمت ہوتی نظر آتی ہے ۔
حقیقت میں خدا نے اس ماہ کو انسان کی تربیت کے لیے ایک ذریعہ قرار دیا ہے۔رمضان المبارک انسان کے احساس کو بیدار کرتا ہے یہ احساس صرف رمضان میں نہیں بلکہ پورا سال زندہ رہنا چاہیے۔انسان کو اس ماہ سے سیکھ کر باقی مہینوں میں بھی عمل کرنا چاہیے۔
جس طرح رمضان المبارک میں پابندی سے نماز ، نماز شپ، قرآن، دعا، فقیروں کو کھانا کھلانا، غریبوں کی مدد کرنا، اور جتنے بھی نیک اعمال پابندی سے انجام دیتے ہیں اسی طرح پورا سال بھی ان پہ عمل جاری رہنا چاہیے۔
یہ امر تحقیق شدہ ہے کہ اگر انسان کوئی نئی عادت اپنانا چاہے یا کسی پرانی عادت سے چھٹکارا حاصل کرنا چاہے تو کم و بیش ایک ماہ تک تمرین (مشق) کرے۔خداوند نے اپنے لطف سے ماہِ رمضان میں موقع فراہم کیا تاکہ انسان بندگی کی مشق کرے اور پھر اس مشق کے ذریعے اپنی فطرت کی طرف واپس پلٹے۔
(فِطۡرَتَ اللّٰہِ الَّتِیۡ فَطَرَ النَّاسَ عَلَیۡہَا ؕ
اللہ کی اس فطرت کی طرف جس پر اس نے سب انسانوں کو پیدا کیا ہے۔
رمضان المبارک صرف 30 دن کے لیے نہیں آتا بلکہ پورے سال ہمارے لیے تربیت گاہ کے طور پہ آتا ہے۔ہماری فطرت کو خدا اور خداوند کریم کے بندوں کے ساتھ متصل کرنے کے لیے آتا ہے۔ یاد رکھیں کہ رمضان المبارک کے ایام اپنے اختتام کو پہنچے ہیں نہ کہ ہمارا مومن ہونا یا مسلمان ہونا اختتام کو پہنچا ہے ۔


افکار و نظریات: daily, weekly, news, monthly