اس بیاباں میں گل تر نے ابھی آنا ہے

ربذۂ عصر میں بوزر نے ابھی آنا ہے

حر مزاجوں نے تری صف سے نکلنا ہے ابھی

دشت افکار میں صرصر نے ابھی آنا ہے

تیرے انکار میں شمشیر و علم آئے ہیں

سر دربار مرے سر نے ابھی آنا ہے

میرے مشکیزۂ خالی کے تعاقب میں رئیس

خیمۂ سبز میں کوثر نے ابھی آنا ہے

.....رئیس عباس۔۔۔۔۔

دیکھ ذرا یہ بت گری

 خاک ہوئی ہے آزری 

مجھ سے لپٹ گئی نگار 

خواب میں اس قدر ڈری 

خون بدن میں جل گیا 

جان ہنر میں جب دھری 

دہر میں ارتعاش کر 

توڑ سکوتِ شش دری 

لفظ مرے جلو میں تھے 

بات کوئی نہیں کری 

آنکھ سے آشنا نہیں 

خواب سی ہے وہ جل پری 

کوئی مریضِ کفر لا

دیکھ مری پیمبری 

اوج سناں پہ دیکھیے 

کیا ہے مری سخنوری 

عشق برادرانہ مل 

چھوڑ سلام سرسری 

وسعت لا مکاں میں ہوں 

راس ہے مجھ کو بے گھری

 خون سے بھر گئی رئیس

 مشک وہ حسرتوں بھری

 رئیس عباس

  ۔۔۔۔۔۔۔۔۔۔۔۔۔۔

آنکھ سے تیر کو نکالا نہیں

خواب, تعبیر سے اجالا نہیں

تھل کو دریا سمجھ کے اترے ہیں

اس لیے موج نے اچھالا نہیں

عصرِ نو ہم بھی کتنے سادہ ہیں

تیرے قالب میں خود کو ڈھالا نہیں

میری ہستی مری متاعِ قلیل

تجھ کو اک گام بھی سنبھالا نہیں

چشمِ امکاں! ترے چراغوں میں

میرے معیار کا اجالا نہیں

شب کے تیور بتا رہے ہیں رئیس

پیش منظر بدلنے والا نہیں

رئیس عباس

۔۔۔۔۔۔۔۔۔۔۔۔۔۔۔۔۔۔۔۔۔۔

مجھ سے بے ذر کو ابوذر نہیں ہونے دیتے

لوگ قطرے کو سمندر نہیں ہونے دیتے

ہجر و ہجرت مجھے نیزے پہ لیے پھرتے ہیں

میرے زخموں کو یہ بہتر نہیں ہونے دیتے

موجۂ خون میں کوثر کا نمو خیز احساس

کچھ حوالے مجھے ابتر نہیں ہونے دیتے

قریۂ دل میں دھڑکتے ہوئے آئینہ مزاج

حیرت آباد کو پتھر نہیں ہونے دیتے

سلسلے نور کے یثرب سے یہاں آتے ہیں

اور اندھیروں کو مقدر نہیں ہونے دیتے

جبرِ پیہم ترے نیزوں کو خبر ہے کہ انہیں

ہم کبھی سرکے برابر نہیں ہونے دیتے

صدف چشم سے امکان گرے جاتے ہیں

غم کسی آنسو کو گوہر نہیں ہونے دیتے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سلام

شدتِ عہدِ زیاں کار کو سر کیسے کریں
معتبر وقت کی اِس دار کو سر کیسے کریں
مشعلِ احسنِ تقویم! کوئی رستہ دکھا
وحشتِ ہستیِ دشوار کو سر کیسے کریں
بوذرِ دشت نشیں! تیرے طرفدار و امیں
ربذہِ عصر کے آزار کو سر کیسے کریں
راکبِ نوکِ سناں! قبلہِ تسلیم و رضا
ہم بھلا صبر کے معیار کو سر کیسے کریں
زندگی کیسے کریں آلِ محمد ص کے سوا
آخر اس شام کے بازار کو سر کیسے کریں
مصحفِ شوق میں کس طور بھریں نور کا رنگ
فکرِ عمران کے انوار کو سر کیسے کریں
دمِ شمشیر پہ کس طرح قدم رکھیں رئیس! 
جادہِ عشقِ ثمربار کو سر کیسے کریں

.............

دیوان ہو معتبر ہمارا
اتنا بھی نہیں ہنر ہمارا
یہ صبح سناں پہ رونمائی
یہ شام برہنہ سر ہمارا
ہم جادہء نعت پر رواں ہوں
اور ختم نہ ہو سفر ہمارا 
آباد ہوں تیری داستاں میں
چرچا ہو نگر نگر ہمارا
آنکھوں سے لپٹ رہی ہے خوشبو
اک خواب ہے ہمسفر ہمارا
 


افکار و نظریات: رئیس عباس کا کلام